Hier aan die begin van ʼn nuwe jaar het baie van ons die voorneme om ons lewe op verskillende maniere te verbeter, en een van die belangrike aspekte wat dikwels bo-aan die lys is, is finansiële welstand. Ongeag in watter finansiële posisie jy is, dit kan altyd beter.
Hier is ʼn paar wenke wat die weg kan baan vir finansiële fiksheid in die nuwe jaar:
1. Werk met ʼn plan
As jy versuim om te beplan, beplan jy om te faal, soos die gesegde lui. En dit geld veral vir jou geldsake. Wanneer jy na jou planne en doelwitte kyk, dink
kort, medium en lang termyn, en onthou dat niks wat die moeite werd is, verkry word sonder ʼn weldeurdagte plan wat dit ondersteun nie. Gesels met ʼn
finansiële beplanner om jou te help om sukses te behaal.
2. Stel ʼn begroting op... en hou daarby
As jy nie begroot nie, gaan jy nie weet hoeveel jy het en hoeveel jy nodig het om jou maandelikse uitgawes te kan dek nie. Niemand kan hul geldsake
suksesvol bestuur as hulle nie weet wat hul inkomste en uitgawes is nie.
3. Vermy slegte skuld
Moenie in die versoeking kom om groot items te koop wat jy nie kan bekostig nie. As jy iets koop waarvoor jy nie kontant kan betaal nie, sal dit jou oor die
langer termyn baie meer kos en druk op jou maandelikse begroting plaas. Spaar liewer vir iets wat jy nodig het of graag wil hê, in plaas van om skuld aan te
gaan.
Stel die beloning uit – streef doelwitte na
Ons hou almal daarvan om onsself te beloon vir harde werk. Onthou net – sorgvuldige beplanning om ʼn gewenste uitkoms te hê op ʼn tydstip wanneer ons
dit kan bekostig, is baie meer werd as om onmiddellik beloon te word op ʼn tydstip wanneer ons geldsake onder druk is. Kweek die gewoonte aan om te
spaar en reël outomatiese aftrekkings van bydraes tot jou spaar- en beleggingsrekeninge. Begin vroeg beplan vir aftrede.
4. Maak dit ʼn prioriteit om te spaar, nie bloot ʼn nagedagte nie
Dit sal spaar gelykstel met elke ander element van jou finansiële plan en begroting – en dis presies waar dit behoort te wees.
Finansiële fiksheid is ʼn reis wat toewyding, dissipline en volgehoue inspanning verg. As jy hierdie wenke toepas, kan jy ʼn stewige grondslag vir ʼn
voorspoedige en veilige toekoms skep. Onthou, gereelde klein treetjies kan groot finansiële vordering beteken. Mag die nuwe jaar verrykende ervarings en
finansiële fiksheid inhou!
Sanlam Lewens is ‘n Gelisensieerde Lewensversekeraar, Verskaffer van Finansiële Dienste en Geregistreerde Kredietverskaffer (NCRCP43)