Daar was nog nooit so ʼn groot behoefte dat ouers hul kinders ʼn sterk finansiële grondslag gee nie. Vir dié wat nie seker is waar om te begin nie – hier is ʼn paar wenke (en pret-idees) om hierdie gesprek aan te gang te sit.
1. Moedig kinders van jongs af aan om te spaar
Bevorder hierdie belangrike finansiële gewoonte deur hulle te beloon as hulle spaar – sit byvoorbeeld ietsie ekstra by vir elke R100 wat hulle spaar, om dit vir hulle aantreklik te maak en hulle terselfdertyd die waarde van geld en geduld te leer.
2. Deel verhale van suksesvolle familielede
Deel verhale van familielede wat finansieel suksesvol is, om kinders oor slim geldbestuur te leer. Identifiseer ʼn familielid wat wyse finansiële besluite geneem het en vertel hul verhaal.
3. Help jou kind om klein uitgawes dop te hou
Help jou kind om tred te hou met klein uitgawes, soos om elke dag ʼn koeldrank te koop, sodat hulle leer om in die toekoms onbesonne besteding te vermy. ʼn Goeie idee is om sap of koeldrank in te pak skool toe, om die koeldrank te vervang en daardie geld te spaar vir iets wat hulle regtig nodig het of graag wil hê.
4. Gesels openlik oor skuld
Die bespreking van skuld is nog ʼn uiters belangrike aspek van finansiële opvoeding. Om dit makliker te maak om te verstaan, gebruik bordspeletjies soos Monopoly om te illustreer wat die gevolge is as jy geld leen.
5. Volg ʼn hibriede benadering tot geld
Vul digitale hulpmiddels aan met tasbare stelsels – bv. die “koevertmetode”, om kontant vir verskillende doeleindes in koeverte te plaas. Dit sal kinders help om die konsep van ʼn begroting en die waarde van kontant te verstaan.
6. Lei deur die voorbeeld te stel
Erken wat jy nie weet nie, en kry die hulp wat jy nodig het om jou kinders die grondbeginsels van geldbestuur te leer – veral as jy nie genoeg touwys gemaak is oor geldsake toe jy nog ʼn kind was nie.
7. Laat jou kinders met sekerheid leef
Jy hoef nie alles oor jou geldsake te verduidelik nie, maar betrek hulle by sekere belangrike aspekte – verduidelik byvoorbeeld hoekom julle nie vir ʼn spesifieke geleentheid kan weggaan nie, en organiseer ook ʼn gesinsuitstappie sommer die naweek net daarna.
Sanlam Lewens is ‘n Gelisensieerde Lewensversekeraar, Verskaffer van Finansiële Dienste en Geregistreerde Kredietverskaffer (NCRCP43)