Foto: Ligbron se O/17 A sewes rugbyspan
Ligbron se 0/17 A-sewes rugbyspan het die afgelope naweek vir die tweede Saterdag agtereenvolgens koning gekraai op die rugbyveld.
Op Saterdag 7 September 2024 het die Impi Visser-toernooi by EHS plaasgevind. Ligbron het vier uit hul vyf wedstryde oortuigend gewen. Die feit dat hulle in die halfeindstryd teen Ligbron se 0/17B-span gespeel het, was 'n bewys dat hulle die dag oorheers het. Hul grootste opponent was Hoërskool Middelburg, wat hulle in die eindstryd met 19 -12 verslaan het. Dit is duidelik dat hul deelname aan die Noordvaal Plaatafdeling, waar hulle teen gedugte stadsskole moes meeding, hulle goed voorberei het vir die sewesseisoen.
Die 0/15 A-span het tweede in die toernooi geëindig. In die halfeindstryd het hulle HTS Middelburg met 21 - 19 geklop. Die eindstryd was, soos die halfeindstryd, 'n gelykop wedstryd wat hulle met 26-28 verloor het.
Saterdag se vertoning was 'n herhaling van hul sukses by die 7's Rugby-toernooi wat voorheen by Hoërskool Piet Retief aangebied is, waar die 0/17A-span tydens die Agricol Mpumalanga Seweskampioenskappe as Mpumalanga-kampioene aangewys is. Tydens hierdie kampioenskappe het die 0/15A-span ook tweede geëindig.