Ligbron is nie net 'n skool nie; dis ook 'n huis. Dit is 'n plek vol avontuur, liefde en familie. My jare by Ligbron was baie spesiaal, maar wat my die meeste beïndruk het, was die onderwysers. Elke liewe onderwyser, vanaf graad 8 tot 12, was passievol oor hul werk. Ek het dit geniet om in 'n klaskamer in te stap en te weet dat die onderwysers my altyd met 'n glimlag sou groet.
Een van my hoogtepunte, wat ek vir altyd sal onthou, was net voor 'n eerste span rugbywedstryd. Een van ons menere het op die veld uitgehardloop in tradisionele klere en gedans, soortgelyk aan hoe die Springbokke hul rituele uitvoer voor 'n wedstryd. Dit was 'n onvergeetlike oomblik wat ons almal geïnspireer het.
In my jaar as hoofseun het ek geleer dat "vele hande ligte werk maak." Aan die begin van die jaar was ek baie bekommerd oor hoe ek alles sou hanteer, maar danksy 'n ongelooflike LLB-leierspan, het hulle my werk baie ligter gemaak. Ek het besef dat 'n goeie span enige taak of probleem makliker kan oplos.
Wat Ligbron vir my uniek maak, is die uitstekende fasiliteite. Ligbron het van die beste fasiliteite wat gereeld opgegradeer word om te verseker dat leerders die beste moontlike onderrig ontvang.
My planne vir die toekoms is om rugby te speel, maar ook om verder te studeer. Ek hoop om eendag my eie besigheid te begin en suksesvol te wees in alles wat ek aanpak.
~ Hoofseun 2024, Jaco van Wyk
Wat n voorreg was dit nie om vir vyf jare agter die skoolbanke van Ligbron te kon spandeer nie! Ek het so baie herinneringe en as die klaskamers stories kon vertel, sou jy nooit ophou luister nie!
Op die sportvelde weergalm die Liggie kreet en my hart bars van trots wanneer ek terug dink aan elke oomblik wat ek ervaar het tydens sportbyeenkomste. By Ligbron het ek geleer hoe om aan te hou en hoe om uit te hou.
Elke onderwyser speel dag na dag so groot rol in ons lewens as Liggies. My graad 12 jaar was vol lewenslesse en ek het soveel gegroei en daar was so baie ondersteuning van elke onderwyser.
Ek is opgewonde oor wat die toekoms vir Ligbron inhou en wens die skool soveel voorspoed toe. By Ligbron bou mens bande wat jou dra wanneer die opdraende te steil word en wanneer die wedstryd te lank voel. Ek sal nooit genoeg dankie kan sê vir al die opofferings wat gemaak is vir ons nie. Ek stap hier weg met n hart vol dankbaarheid en lesse wat ek oor die jare altyd sal onthou!
~ Hoofmeisie 2024, Elandri Kleynhans