Foto: Ligbron se meisies fietsryspan met hul afrigter Cherise Purcocks
Die afgelope Saterdag het 19 talentvolle fietsryers van Ligbron Akademie vir Tegnologie deelgeneem aan die eerste rondte van die XCM (Cross-Country Marathon) wat deur Piet Retief Wheelers aangebied is by Hoërskool Piet Retief.
Die uitdagende roete, wat tussen 15 km en 75 km gewissel het na gelang van ouderdomsgroepe, het kort maar steil bulte ingesluit wat net voor die eindstreep geklim moes word.
Sterk prestasies deur Ligbron-leerders
Die Liggies het hul staal gewys met verskeie podiumplekke en top-5-uitslae:
Anelie Geel – 3de plek in die Sub-Junior Meisies-afdeling (30 km).
Rou-An Drotsky – 5de plek in die Sub-Junior Seuns-afdeling (30 km).
Michael Gouws – 5de plek in die Seuns Jeug-afdeling (47 km).
Afrigters wys die pad
Die Ligbron-afrigters het self aan die wedren deelgeneem en gewys dat harde werk en toewyding vrugte afwerp:
Duane Purcocks het 5de geëindig in die Mans Sub-veterane-afdeling.
Grové Eksteen het ‘n skitterende 2de plek in die Meesters-afdeling behaal.
Vir die meisiesspan was dit hul heel eerste wedloop, en hulle het met selfvertroue en deursettingsvermoë gevaar. Die ervaring het hul vermoëns getoets en hulle gemotiveer om hul prestasies in komende wedrenne verder te verbeter.
Die Ligbron-afrigters het die wedren as ‘n goed georganiseerde en positiewe ervaring beskryf. Met ‘n goeie span gees en vasberadenheid sien hulle en hul fietsryers uit na ‘n seisoen vol uitdagings en sukses.