Wat begin het as ’n kind se passie, van sy pa, Charles Wahlstrand Snr, (een van die Mpumalanga Potspel stigters lede) het gegroei tot ’n indrukwekkende sportloopbaan.
Charles Wahlstrand se liefde vir potspel het op die ouderdom van nege begin, toe hy met ’n sak vol leë glaskoeldrankbottels kafee toe gefiets het om vir ’n paar minute se speeltijd te betaal. Dertig jaar later is die sport nie net ’n tydverdryf nie, maar ’n lewensroeping wat hy met dissipline, toewyding en trots beoefen. In Julie is Wahlstrand opnuut gekies vir die Mans Mpumalanga A-span wat aan die Nasionale Swartbal Kampioenskappe gaan deelneem. Hierdie prestasie kom as gevolg van dekades se harde werk, verskeie toekennings en ’n indrukwekkende wenrekord van 93%
Foto: Ashley Teixeira.
Meer as net ’n kroegspeletjie
Wahlstrand speel verskeie dissiplines binne die Cue Sport-genre, insluitend 8-bal, swartbal, snoeker, 9-bal, en selfs Chinese 8-bal. Van kindsbeen af het hy homself toegewy aan die verbetering van sy tegniek, selfs onder professionele afrigting. Sy loopbaan spog met onder meer:
- ’n O/18 SA-kampioenskapskwalifikasie op 14-jarige ouderdom,
- Behaal sy eerste voltooide “Apple” (breek-en-sink van al die balle sonder teenstand) op dieselfde ouderdom van 14,
- ’n Lid van die Suid-Afrikaanse span wat derde plek tydens die 2013 Wêreldkampioenskappe in Londen behaal het,
- Erkenning as Mpumalanga sportman van die jaar in onderskeidelik 2015, 2016 en 2017,
- Oorwinnings in meer as 15 Mpumalanga Kampioenskappe, insluitend gemengde dubbels,
- En meer as 300 voltooide "Apples" oor sy loopbaan.
Op pad na die Protea-span
Hoewel Charles al 22 keer aan Nasionale Kampioenskappe deelgeneem het, glo hy 2025 is sy jaar. Hy is in topvorm – fisiek, tegnies en geestelik – en sy doelwit is duidelik: om sy Protea-kleure te verwerf. Dié jaar se Swartbal Kampioenskappe vind plaas van 12 tot 19 Julie by eBundu Lodge in Nelspruit.
Foto: Ashley Teixeira.
Die koste van ’n droom
Soos met baie nie-gesubsidieerde sporte, dra Charles en sy gesin die volle finansiële las van deelname. Hulle is tans besig om borgskappe in te samel vir die komende kampioenskap en nooi besighede en individue uit om betrokke te raak. Enige bydrae kan ’n groot verskil maak. Belangstellendes kan Charles by 083 310 9482 of sy vrou Charlé by 076 857 9704 kontak vir meer inligting.
Foto: Ashley Teixeira.
Toekomsvisie: Afrigting en bewustheid
Charles droom nie net van kompetisie nie – hy wil ook ’n erkende afrigter word, beide aanlyn en in persoon, om jongmense in die sport in te lei. Vir hom is potspel ’n “Gentleman’s Game” wat dissipline, tegniek en respek bevorder – waardes wat hy graag wil oordra aan ’n nuwe geslag spelers.
Met ’n hart vol dankbaarheid teenoor God, sy gesin en borge, kyk Charles met hoop na wat voorlê. Sy verhaal is ’n bewys van wat moontlik is wanneer passie en deursettingsvermoë saamwerk.