Finansiële wysheid kan van jongs af ontwikkel word. Hier is drie maniere waarop jy jou kinders kan help om groter selfvertroue te kry deur hul finansiële geletterdheid te ontwikkel.
1. Leer hulle hoe belangrik dit is om geld te verdien
Of julle nou ʼn buitelug-koekverkoping in die buurt reël, of jy jou kinders finansieel beloon as hulle sekere huistake verrig (troeteldiere kos gee, wasgoed
ophang, ens.), as jy hulle leer hoe om geld te verdien – en hoekom dit belangrik is om dit te doen – bemagtig jy hulle.
2. Leer hulle hoe om te begroot en te spaar
Om te leer om die geld wat jy verdien te bestuur, is ʼn onmisbare deel van finansiële geletterdheid. Gesels met jou kinders oor die dinge waarvoor hulle
geld nodig het (wil hê) vir die maand – bv. snoepiegeld een keer per week, geld vir ʼn nuwe boek of ʼn pretuitstappie. Verduidelik vir hulle hoe hulle die geld
wat hulle verdien het, moet gebruik om te begroot vir die dinge wat hulle wil hê. As hulle nie genoeg geld het om alles te koop nie, moet hulle besluit wat
hulle eerder die volgende maand wil kry. As hulle iets duurs wil hê – soos ʼn fiets of ʼn Lego-stel – verduidelik vir hulle dat hulle moet spaar, en hoe hulle dit
moet doen. Dit is ook ʼn lewensbelangrike les oor uitgestelde satisfaksie – dat dit die moeite werd is om te spaar vir iets wat waardevol is.
3. Leer hulle oor krediet en skuld
Kinders raak vinnig bewus van dinge, en het waarskynlik al gesien hoe jy jou “towerkaart” by die winkels gebruik. Dis belangrik om vir hulle te verduidelik
hoe ʼn bankkaart werk, wat krediet is en waarvoor dit gebruik word, en – as dit nie reg gebruik word nie – hoe dit jou in ʼn penarie (skuld) kan laat beland.
Noudat jy jou wysheid met jou kinders gedeel het, moet jy met ʼn kenner gesels? Kontak ʼn gekwalifiseerde finansiële adviseur van Sanlam vir holistiese advies wat jou unieke omstandighede in ag neem, om jou te help beplan vir ʼn lewe met finansiële sekerheid.
Sanlam Lewens is ‘n Gelisensieerde Lewensversekeraar, Verskaffer van Finansiële Dienste en Geregistreerde Kredietverskaffer (NCRCP43)