Foto: Ligbron se eerste meisiesspan
Die krieketseisoen is in volle vaart en Ligbron het verlede week verskeie wedstryde gespeel.
Die Liggies se eerste meisiesspan het teen Hoërskool Secunda se tweede span gespeel en die wedstryd met 8 paaltjies gewen. Secunda het eerste gekolf en is in die 16de boulbeurt vir 52 lopies uitgehaal. Nabihah Jassat en Asanda Mathebula het elk drie paaltjies laat kantel. Die Liggies het Secunda reeds in die 4de boulbeurt verby gevat met 53 lopies. Amelia Brummer het goeie werk agter die kolf gedoen en teken 33 lopies van 20 balle aan.
Die tweede meisiesspan het teen Hoërskool Oosterland gespeel. Die Liggies het eerste gekolf en is in die 16de boulbeurt vir 63 lopies uitgehaal. Oosterland se kolwers behaal 67 lopies in die 6de boulbeurt en wen die wedstryd met 9 paaltjies.
Foto: Ligbron se eerste seunsspan
Die eerste seunsspan het Donderdag teen Hoërskool Oosterland se tweede span gespeel en wen die wedstryd met 6 paaltjies. Oosterland het eerste gekolf en word vir 69 lopies in die 13de boulbeurt uitgehaal. Lohan Swart het met uitstekende boulwerk 5 paaltjies van 17 lopies gevat. Kort op sy hakke was Johardt Swanepoel wat 3 paaltjies vir 12 lopies gevat het. Die Liggies het Oosterland in die 12de boulbeurt verby gevat met 70 lopies vir vier paaltjies.
Saterdag het die span hul tweede oorwinning vir die week behaal toe hulle teen Hoërskool Piet Retief gespeel het. Piet Retief is in die 38ste boulbeurt vir 227 lopies uitgehaal. Ligbron het daarna gekolf en het hul opponent in die 34ste boulbeurt verby gevat met 231 lopies vir die verlies van 8 paaltjies. RJ Kinnear was die ster van hierdie wedstryd waarin hy 70 lopies van 38 balle gekolf het. Ligbron wen die wedstryd met twee paaltjies.