Foto (vlnr): Dick Rouillard, Elizma Swart, mnr Hennie Dippenaar, me Annemie Martins, Wianke Cloete en Ryno Maritz
Vir die derde agtereenvolgende jaar bied Hoërskool Ermelo hul jaarlikse Hoëveld EHS-Tennistoernooi aan. Vrydagoggend is die vure aangesteek en skole is van ver af verwelkom. Vir die eerste keer verwelkom EHS vir Hoërskool Garsfontein asook WJTA Tennis-akademie. Die Vrydag en Saterdag, 30 en 31 Augustus, het sewe skole teen mekaar meegeding in 'n rondomtalie formaat.
Hierdie jaar was die eerste keer wat daar tot laat die Vrydagaand tennis gespeel is onder die spreiligte. Tussendeur het spelers 'n geborgte middagete van PAS Prokureurs geniet en die aand is daar worsbroodjies gebraai wat deur Vleismark geborg is.
Saterdagoggend is die laaste twee rondes gespeel en HTS Middelburg tree as wenners uit die stryd vir 'n tweede agtereenvolgende jaar. Hoërskool Piet Retief wen ook vir 'n tweede agtereenvolgende jaar die JL Sportmanskap-Wisseltrofee. Baie geluk aan beide hierdie skole.
Na die prysuitdeling het Wimpy die spelers bederf met 'n burger en chips voor hul vertrek het.
Die Hoëveld EHS-Tennistoernooi was 'n reuse sukses en EHS sien reeds uit na volgende jaar.
Dankie aan al die borge en die tennisouers wat bygedra het tot die sukses van die naweek.