Deeglike boedelbeplanning, veral die opstel van ‘n geldige testament, is noodsaaklik om jou bates te beskerm en te verseker dat jou geliefdes ná jou dood versorg sal wees. Tog het meer as 70% Suid-Afrikaners nie ‘n testament nie. Dit is dikwels te wyte aan die dwaling dat dit duur, ingewikkeld of eers later in die lewe nodig is.
Waarom moet jy ‘n testament hê?
Sonder ‘n testament word jou bates verdeel ooreenkomstig die Wet op Intestate Erfopvolging, wat moontlik nie jou wense weerspieël nie. Byvoorbeeld, as jy in ‘n langtermynverhouding is sonder om wettig getroud te wees, kan jou lewensmaat dalk met niks agtergelaat word. ‘n Testament stel jou in staat om te bepaal hoe jou boedel verdeel moet word, om voorsiening te maak vir spesiale omstandighede soos die versorging van jong kinders of gestremde familielede, en om komplikasies vir jou geliefdes te vermy.
Belangrike voordele van ‘n testament
Beheer en duidelikheid: Jy besluit hoe jou bates verdeel moet word, wat onenigheid onder familielede verminder en onnodige rompslomp voorkom.
Voogde: Jy kan ‘n betroubare voog vir minderjarige kinders aanwys, wat verseker dat hul versorging in ooreenstemming met jou wense is.
Belasting- en skuldbeplanning: ‘n Testament stel jou in staat om belastingverpligtinge en die delging van skuld te bestuur, wat die las op diegene wat agterbly, verlig.
Gemoedsrus: Die wete dat voorsiening vir jou geliefdes en gekose sake gemaak is, bring gemoedsrus en gerusstelling.
Opstel van jou testament
Alhoewel jy regtens jou eie testament kan opstel, is dit raadsaam om ‘n deskundige te raadpleeg. ‘n Professionele persoon sal verseker dat jou testament volgens wet en in ooreenstemming met boedelbeplanningsdokumente is, aan belastingregulasies voldoen en ingewikkelde kwessies soos aftreefondse dek.
In teenstelling met prokureurs, banke en ander instellings wat ‘n fooi vir die diens hef, is Sanlam Legacy gratis. Met Sanlam Legacy kan jy ‘n onbeperkte aantal wysigings aanbring, en jou testament word kosteloos bewaar. Jy kan jou finansiële adviseur versoek om ‘n konsultasie met ‘n deskundige te reël. So ‘n konsultasie behoort nie meer as ‘n uur van jou tyd in beslag te neem nie.
September se Testamente-week is die ideale tyd om boedelbeplanning met jou Sanlam finansiële adviseur te bespreek.
