Die vakansietyd gaan dikwels gepaard met ʼn string uitgawes wat aan jou sak vat en jou geldsake knou, en dan kom die spyt na al die vrolike feesvierings en pret. Met ʼn strategiese benadering en sorgvuldige beplanning kan die vakansietyd egter ʼn vreugdevolle geleentheid sonder geldstres wees. Hier is ʼn paar idees om dít te vermag:
- Beplan jou besteding: Hou jou uitgawes fyn dop en weet wanneer jy jou finansiële limiet bereik het. Om oorbesteding te vermy, gebruik vorige jare se uitgawes as ʼn riglyn en maak ʼn lys van uitgawes wat jy waarskynlik sal aangaan. Dit sal jou help om vooruit te beplan en die nodige aanpassings te maak.
- Belê in verhoudings: Die vakansie is eintlik ʼn tyd om die emosionele bande met vriende en familie en die kosbare oomblikke saam te koester. Dit gaan nie oor die geldwaarde van geskenke of hoe ryklik alles versier word nie. Aktiwiteite wat sterker bande smee en jou nie platsak sal maak nie, kan net soveel vervulling bring.
- Doen jou navorsing: Doen eers navorsing en vergelyk pryse aanlyn, voordat jy iets koop. Benut afslagpryse, uitverkopings en lojaliteitsprogramme. Oorweeg dit om voor of na die vakansieseisoen inkopies te doen, om beter pryse te kry.
- Moenie skuld laat oploop nie: Die versoeking om gedurende die vakansie geld uit te gee, kan beteken dat jy daarna met ʼn skuldlas sit. Moenie iets koop as jy dit nie regtig nodig het nie, en nog belangriker – moenie kredietkaarte en lenings gebruik om hierdie onnodige aankope te befonds nie.
- Geskenke wat nie geld kos nie, bring vreugde: Dink aan ander maniere om fees te vier, soos om vrywillige diens te lewer of sinvolle ervarings te skep. Om iets aan die gemeenskap terug te gee, kan meer vervulling bring as materialistiese oordaad.
- Moenie jou feesvierings, versierings of geskenke met die bure s’n vergelyk nie: Konsentreer daarop om binne jou begroting te bly en fees te vier volgens wat jou sak pas, sonder om te voel jy móét by ander byhou. In plaas van om materiële besittings of weelde te vergelyk, vier liewer die reis wat jy aangepak het en die mylpale wat jy bereik het, met dankbaarheid vir wat jy het.
Onthou, die vakansie is ʼn tyd om balans te probeer kry. Jy kan die feestelikhede geniet sonder om in ʼn finansiële verknorsing te beland, deur jou finansiële welstand voorop te stel en oordeelkundig te bestee.
Sanlam Lewens is ‘n Gelisensieerde Lewensversekeraar, Verskaffer van Finansiële Dienste en Geregistreerde Kredietverskaffer (NCRCP43)