Foto: Ligbronse eerste meisieskrieketspan
Ligbron se eerste meisieskrieketspan is Mpumalanga kampioene van die Suid Afrikaanse T20 reeks na hul onlangse oorwinning in die eindstryd teen Hoërskool Middelburg.
Hulle het die wedstryd met 9 paaltjies gewen. Die Liggies het die loot gewen en gekies om eerste te boul. Hulle het die Middelburgers in die 15de speelbeurt vir 72 lopies uitgehaal. Christelle van Wyk het 4 paaltjies vir 18 lopies gevat en Kristen Loyd het 23 lopies afgestaan vir drie paaltjies.
Die Liggies het drie kolwers ingestuur wat in 14 speelbeurte Middelburg se totaal oorskry het. Asanda Mathebula het 24 lopies van 34 balle aangeteken, nie uit nie.
Hierdie was nie die span se enigste prestasie tydens die afgelope seisoen nie. In die Mpumalanga 50-speelbeurt reeks was hul ook die kampioene nadat hulle ‘n oorwinning oor Hoërskool Lydenburg in die eindstryd behaal het. In die Noordvaal liga het hulle derde in Mpumalanga geeindig.
Die 2024 seisoen was die derde seisoen waarin hierdie span uitsonderlike prestasies op die krieketveld behaal het. In 2022 en 2023 was hul Mpumalanga kampioene. Hulle word vir die afgelope drie jaar deur Pieter van der Merwe afgerig, wat deur Chante van Greunen en Leoné Bakker as hulpafrigters bygestaan is. Dis span se goeie prestasies spreek boekdele oor die kwaliteit afrigting van hierdie drie.